ભૂજમાં બીએસએફની કાર્યવાહી, સાત બોટ જપ્ત, બે માછીમારોની ધરપકડ

ગુજરાતના ભુજના હરામીનાળા વિસ્તારમાંથી બોર્ડર સિક્યોરિટી ફોર્સે સાત પાકિસ્તાની બોટ જપ્ત કરી છે. આ સિવાય 2 પાકિસ્તાની માછીમારોની પણ ધરપકડ કરવામાં આવી છે. જવાનો દ્વારા 2 દિવસથી ચાલી રહેલા સર્ચ ઓપરેશન દરમિયાન આ સફળતા મળી છે. BSFએ કહ્યું કે, નલિયા એરફોર્સ સ્ટેશને સોમવારે તેમને માહિતી આપી હતી કે કેટલીક પાકિસ્તાની બોટ અને માછીમારો ભારતીય ક્ષેત્રમાં આવતા જોવા મળ્યા હતા.

ત્યારબાદ, 10 ઓક્ટોબરથી શરૂ થયેલા સર્ચ ઓપરેશનમાં હરામી નાલાના સામાન્ય વિસ્તારમાં પાકિસ્તાની ફિશિંગ બોટની શંકાસ્પદ હિલચાલ જોવા મળી હતી. આ પછી, BSF સર્ચ ટીમે સાત પાકિસ્તાની ફિશિંગ બોટ રિકવર કરી છે.

આ ઉપરાંત સમગ્ર ઓપરેશનમાં બે પાકિસ્તાની માછીમારો પણ ઝડપાયા છે. જપ્ત કરાયેલી બોટની સઘન તપાસ કરવામાં આવી હતી અને બોટમાંથી કેટલીક માછલીઓ, માછીમારીની જાળ, જેરી કેન, ખાદ્ય ચીજવસ્તુઓ, બરફ સાથેના આઇસબોક્સ અને માછીમારીના સાધનો સિવાય કશું જ શંકાસ્પદ મળ્યું ન હતું.

હાલમાં, BSF અને અન્ય એજન્સીઓ ધરપકડ કરાયેલા પાકિસ્તાની નાગરિકોની પૂછપરછ કરી રહી છે અને તેમના હેતુ અને અન્ય સાથીઓ વિશે માહિતી એકઠી કરી રહી છે. તે જ સમયે, આ વિસ્તારમાં 2 દિવસની સઘન શોધખોળ બાદ સર્ચ ઓપરેશન પાછું ખેંચી લેવામાં આવ્યું છે. તમને જણાવી દઈએ કે, ગુજરાતમાં BSFની કાર્યવાહીમાં અવારનવાર પાકિસ્તાની માછીમારો ઝડપાતા રહે છે.