Israel-Palestine conflict : હમાસના હુમલા બાદ હવે ઈઝરાયેલ જવાબી કાર્યવાહી કરી રહ્યું છે. ઈઝરાયેલ સતત ગાઝા પર બોમ્બ અને મિસાઈલ વડે હુમલો કરી રહ્યું છે. ઇઝરાયેલમાં હમાસના હુમલામાં મૃત્યુઆંક વધીને 900ની આસપાસ પહોંચી ગયો છે, લગભગ 2600 લોકો ઘાયલ થયા છે. તે જ સમયે, ગાઝામાં ઇઝરાયેલના બોમ્બ ધડાકામાં 700 થી વધુ લોકો માર્યા ગયા છે અને 4 હજારથી વધુ લોકો ઘાયલ થયા છે. બીજી તરફ ગાઝા પર સતત બોમ્બ ધડાકા કર્યા બાદ હવે હમાસના સૈન્ય પ્રવક્તાએ ધમકી આપી છે કે જો ગાઝા પટ્ટીના નાગરિકો પર કોઈપણ ચેતવણી આપ્યા વિના હુમલો કરવામાં આવશે તો આતંકવાદીઓ બંધક બનેલા ઈઝરાયેલના નાગરિકોને મારી નાખશે.
100 ઇઝરાયેલી નાગરિકોના મૃતદેહ મળી આવ્યા છે
દરમિયાન, સમાચાર એજન્સી એપીના અહેવાલ મુજબ, ઇઝરાયલી દળોએ એક ખેત સમુદાયમાં પડેલા 100 મૃતદેહોને બહાર કાઢ્યા હતા. અહીં હમાસે ઈઝરાયેલના નાગરિકોને બંધક બનાવી રાખ્યા હતા. ઈઝરાયેલના વડાપ્રધાન બેન્જામિન નેતન્યાહુએ હમાસ આતંકવાદી જૂથના ટાર્ગેટને નષ્ટ કરવાની પ્રતિજ્ઞા લીધી છે. તેમણે કહ્યું કે ઈઝરાયેલે હમાસ પર હુમલો કરવાની શરૂઆત જ કરી છે. તેણે કહ્યું- 'અમે આ યુદ્ધ ઇચ્છતા નહોતા. તે અમારા પર અત્યંત ક્રૂર રીતે લાદવામાં આવ્યુ હતું. જો કે ઇઝરાયેલે આ યુદ્ધ શરૂ કર્યું ન હતું, પરંતુ ઇઝરાયેલ તેને સમાપ્ત કરશે.