કેન્દ્રીય તપાસ એજન્સી સીબીઆઈએ સોમવારે કોલકાતાની આરજી કાર મેડિકલ કોલેજ અને હોસ્પિટલના ભૂતપૂર્વ પ્રિન્સિપાલ ડૉ. સંદીપ ઘોષની ધરપકડ કરી હતી. સંદીપ ઘોષની ધરપકડના એક કલાકની અંદર, સીબીઆઈ અધિકારીઓએ તેના સુરક્ષા ગાર્ડ અને તે હોસ્પિટલને સામગ્રી સપ્લાય કરનારા બે વિક્રેતાઓની પણ ધરપકડ કરી. તમને જણાવી દઈએ કે કોલકાતાની આરજી કાર મેડિકલ કોલેજ અને હોસ્પિટલમાં એક મહિલા ડૉક્ટર પર બળાત્કાર અને હત્યા કરવામાં આવી હતી, આ કેસની તપાસ સીબીઆઈ દ્વારા કરવામાં આવી રહી છે.
આ ત્રણ લોકોની પણ કરવામાં આવી ધરપકડ
ઉલ્લેખનીય છે કે સીબીઆઈ દ્વારા જે ત્રણ લોકોની ધરપકડ કરવામાં આવી છે તેમાં સંદીપ ઘોષના સિક્યોરિટી ગાર્ડ ઓફિસર અલી ખાન અને બે વેન્ડર બિપ્લવ સિંહા અને સુમન હઝરાનો સમાવેશ થાય છે. હકીકતમાં, 23 ઓગસ્ટના રોજ, કલકત્તા હાઈકોર્ટે હોસ્પિટલમાં કથિત નાણાકીય ગેરરીતિઓની તપાસ SITમાંથી CBIને ટ્રાન્સફર કરવાનો આદેશ આપ્યો હતો. જણાવી દઈએ કે 9 ઓગસ્ટના રોજ આરજી કાર હોસ્પિટલમાં મહિલા ડોક્ટર સાથે કથિત બળાત્કાર અને હત્યાના કેસમાં સંદીપ ઘોષની સીબીઆઈની સોલ્ટ લેક ઓફિસમાં 15 દિવસ સુધી પૂછપરછ કરવામાં આવી હતી. બાદમાં તેને કોલકાતામાં સીબીઆઈની નિઝામ પેલેસ ઓફિસમાં લઈ જવામાં આવ્યો, જ્યાં એજન્સીની ભ્રષ્ટાચાર વિરોધી શાખા છે અને તેની ધરપકડ કરવામાં આવી. આ પહેલા સંજય રોયની પણ ધરપકડ કરવામાં આવી છે.
સંદીપ ઘોષ પર આરોપ
અખ્તર અલીએ આરોપ લગાવ્યો હતો કે સંદીપ ઘોષ વિરુદ્ધ રાજ્ય તકેદારી આયોગ અને એન્ટી કરપ્શન બ્યુરો સમક્ષ એક વર્ષ પહેલાં કરેલી તેમની ફરિયાદોનું કોઈ પરિણામ આવ્યું નથી. તેના બદલે, તેની સંસ્થામાંથી બદલી કરવામાં આવી હતી. અરજીમાં અખ્તર અલીએ સંદીપ ઘોષ પર દાવા વગરના શબના ગેરકાયદે વેચાણ, બાયોમેડિકલ વેસ્ટની દાણચોરી અને દવા અને તબીબી સાધનોના સપ્લાયર્સ દ્વારા ચૂકવવામાં આવતા કમિશનના બદલામાં ટેન્ડર પાસ કરવાનો આરોપ મૂક્યો હતો. અલીએ એવો પણ આરોપ લગાવ્યો હતો કે પરીક્ષા પાસ કરવા માટે વિદ્યાર્થીઓ પર 5 લાખથી 8 લાખ રૂપિયા સુધીની રકમ ચૂકવવાનું દબાણ કરવામાં આવ્યું હતું.