કોંગ્રેસે વિધાનસભાની ચૂંટણી લડવા માગતા ઉમેદવારો માટે 15 સભ્યોની બૂથ સમિતિ બનાવવાની મુદત 21 ઓક્ટોબર નક્કી કરવામાં આવી હતી, જે શુક્વારે પૂરી થતાં પ્રદેશ કોંગ્રેસ સમિતિને 182 વિધાનસભા બેઠકમાંથી ચૂંટણી લડવા માગતી 2000 અરજીઓ મળી છે. એટલે કે, એક વિધાનસભા બેઠક દીઠ છથી વધુ ઉમેદવારો ચૂંટણી જંગમાં ઝૂકાવવા તૈયાર હોવાથી કોંગ્રેસના મોવડીઓ માટે ઉમેદવારોની પસંદગીની પ્રક્રિયા તોફાની બની રહે તેવી પૂરી સંભાવના છે. ગુજરાત કોંગ્રેસે સંગઠનને બેઠું કરવા માટે વિધાનસભાની ચૂંટણી લડવા ઈચ્છુકોને પોતપોતાના વિસ્તારમાં 15 સભ્યોના નામ, સરનામા, ફોટો અને કોન્ટેક્ટ નંબર સાથેની યાદી પ્રદેશ સમિતિને સુપરત કરવાની ફોર્મ્યુલા અપનાવી હતી. આ સભ્યનોંધણીની મુદતમાં વધારો કરીને છેલ્લી તારીખ 21 ઓક્ટોબર નક્કી કરવામાં આવી હતી. શુક્રવારે આ મુદત પૂરી થતાં પ્રદેશ સમિતિને સમગ્ર રાજ્યમાંથી આશરે બે હજારથી વધુ અરજીઓ મળી હોવાનું જાણવા મળ્યું છે. બૂથ સમિતિની પ્રક્રિયા પૂર્ણ થતાં આગામી સપ્તાહથી ઉમેદવારી ફોર્મ ભરાવવાની પ્રક્રિયાનો પ્રારંભ કરાશે.