સંયુક્ત રાષ્ટ્ર સુરક્ષા પરિષદ (યુએનએસસી)એ સોમવારે પાકિસ્તાની મૂળના ચરમપંથી અબ્દુલ રહમાન મક્કીને ‘વૈશ્વિક આતંકી’ જાહેર કર્યો છે.
આ નિર્ણય યુએનએસસીની આઈએસઆઈએલ (દાએશ) અને અલ-કાયદા પ્રતિબંધ સમિતિએ લીધો છે.
ગયા વર્ષે ભારતે લશ્કર-એ-તૈયબના ચરમપંથી અબ્દુલ રહમના મક્કીને વૈશ્વિક આતંકવાદી જાહેર કરવા માટે સંયુક્ત રાષ્ટ્રમાં પ્રસ્તાવ મૂક્યો હતો, પરંતુ ચીને તેને અટકાવી દીધો હતો. ત્યારબાદ ભારતે ચીન અંગે આકરી પ્રતિક્રિયા પણ આપી હતી.
અબ્દુલ રહમાન મક્કી જમાત-ઉદ-દાવાના પ્રમુખ હાફિઝ સઈદના સંબંધી છે, તેમને ભારતમાં 26 નવેમ્બર 2011એ થયેલા ચરમપંથી હુમલાના માસ્ટરમાઇન્ડ માનવામાં આવે છે.
યુએન તરફથી જાહેર કરાયેલા નિવેદન અનુસાર, 16 જાન્યુઆરી, 2023એ સુરક્ષા પરિષદની આઈએસઆઈએલ (દાએશ) અને અલ-કાયદા સમિતિએ વૈશ્વિક આતંકવાદીઓની યાદીમાં અબ્દુલ રહમાન મક્કીનું નામ સામેલ કર્યું છે. તેના પરિણામે દુનિયાભરમાં મક્કીની સંપત્તિ ફ્રીઝ કરવામાં આવશે, મક્કી પર યાત્રા સહિત અન્ય ઘણા પ્રતિબંધ લગાવવામાં આવશે.
સમાચાર એજન્સી એએનઆઈ અનુસાર, ભારત અને અમેરિકા પહેલાંથી જ પોતપોતાના દેશમાં અબ્દુલ રહમાન મક્કીને ‘આતંકવાદી’ જાહેર કરી ચૂક્યા છે. મક્કી પર યુવાઓને ઉગ્રવાદ તરફ ઉશ્કેરવા, ભારતમાં હુમલાની યોજના બનાવવા, ગેરકાયદેસર ફંડ એકત્ર કરવા સહિત ઘણા આરોપો છે.
તાલિબાને ટ્વિટરને વેરિફેકશન ફીચર માટે ભરપાઈ કરવાનું શરૂ કરી દીધું છે. તેનો અર્થ છે કેહવે કેટલાક તાલિબાન નેતાઓનાં એકાઉન્ટમાં બ્લુ ટીક જોવા મળશે.
અગાઉ ટ્વિટર પર સક્રિય જાણીતા અને વિશ્વસનીય એકાઉન્ટને બ્લુ ટીક આપવામાં આવતું હતું. તેને ખરીદી શકાતું ન હતું.
જોકે, હવે યૂઝર્સ તેને નવી ટ્વિટર બ્લુ સર્વિસ દ્વારા ખરીદી શકશે.
ઓછામાં ઓછા બે તાલિબાન અધિકારી અને ચાર પ્રમુખ સમર્થક અફઘાનિસ્તાનમાં બ્લુ ટીકનો ઉપયોગ હાલ કરી રહ્યા છે.
તાલિબાનના માહિતી વિભાગના પ્રમુખ હિદાયતુલ્લાહ હિદાયત પાસે હવે બ્લુ ટીક છે.
તેમના ટ્વિટર પર 1 લાખ 87 હજાર ફૉલોઅર્સ છે અને તેઓ રોજ તાલિબાન પ્રશાસન સાથે જોડાયેલી માહિતી શેર કરે છે.
સ્થાનિક મીડિયા અનુસાર, ગયા મહિને તેઓનું પેઇડ બ્લુ ટીક હટાવી દેવામાં આવ્યું હતું, પરંતુ હવે તે ફરી જોવા મળી રહ્યું છે.
અફઘાનિસ્તાનના માહિતી અને સંસ્કૃતિ મંત્રાલયમાં મીડિયા વૉચડૉગના પ્રમુખ અબ્દુલ હક હમ્માદ પાસે પણ હવે બ્લુ ટીક છે અને આ પ્લૅટફૉર્મ પર તેમને 1 લાખ 70 હજાર લોકો ફોલો કરી રહ્યા છે. તાલિબાનના મોટા સમર્થકોએ પણ બ્લુ ટીક મેળવી લીધું છે.