200 કરોડના મની લોન્ડરિંગ કેસના આરોપી કોનમેન સુકેશ ચંદ્રશેખર અને બોલિવૂડ અભિનેત્રી જેકલીન ફર્નાન્ડીઝની પર્સનલ તસવીરો લીક થયા બાદ આ સંબંધ જગજાહેર થયો છે. આ કેસમાં દરરોજ નવા ખુલાસા થઈ રહ્યા છે. નોરા ફતેહી, સારા અલી ખાન, જાહ્નવી કપૂર પણ સુકેશની હિટ લિસ્ટમાં છે. હવે વધુ એક સમાચાર આવી રહ્યા છે કે સુકેશે જેકલીનને ટિફની બ્રાન્ડની હીરાની વીંટી આપીને પ્રપોઝ કર્યું હતું.
જૈકલીનને આપી ડાયમંડ રિંગ
સુકેશે જેકલીનને હીરાની વીંટી પણ આપી જેમાં J અને S અક્ષરો લખેલા છે. આ પહેલા એવું પણ સામે આવ્યું હતું કે સુકેશે જેકલીનને કરોડોની ગિફ્ટ આપી હતી. જેક્લિને ED અધિકારીઓને કહ્યું હતું કે સુકેશ ચંદ્રશેખરે તેને કહ્યું હતું કે તે જયલલિતાના પરિવાર સાથે સંબંધિત છે. જો કે પૂછપરછ દરમિયાન જેક્લિને સુકેશ સાથેના સંબંધોનો ઈન્કાર કર્યો હતો.
ઝગડો ખતમ કરવા માટે કરી હતી 10 કરોડની ઓફર
એવુ જાણવા મળ્યુ છે કે જેકલીન અને સુકેશ વચ્ચે વેલેન્ટાઈન ડેની આસપાસ ઝઘડો થયો હતો અને તેને ઉકેલવા માટે પિંકી ઈરાનીને 10 કરોડ રૂપિયાની ઓફર કરી હતી. આ પછી તેણે જેકલીનને પ્રપોઝ કરવા માટે હીરાની વીંટી આપી. એવો પણ દાવો કરવામાં આવી રહ્યો છે કે પિંકી ઈરાની ઘણી અભિનેત્રીઓ અને મોડલને સુકેશ સાથે ઓળખાણ કરાવવા માટે તિહાડ જેલમાં લઈ ગઈ હતી.