રાજ્યમાં સતત કોરોનાનું સંકટ વધી રહ્યું છે. છેલ્લા 24 કલાકમાં રાજ્યમાં 54 નવા પોઝિટિવ કેસો નોંધાયા છે. આ સાથે જ રાજ્યમાં કોરોનાના કુલ 432 દર્દીઓ થઈ ગયા છે. ગઈકાલથી આજ સવાર સુધીમાં 54 નવા પોઝિટિવ કેસ સામે આવ્યા હતા. જેમાં અમદાવાદમાં 31, વડોદરામાં 18, આણંદ 3, સુરત 1 અને ભાવનગરમાં 1 પોઝિટિવ કેસનો સમાવેશ થાય છે. અમદાવાદમાં વધુ 31 કેસ નોંધાતા હવે શહેરમાં કુલ 186 કોરોનાના દર્દી થઈ ગયા છે.
આ અંગે આરોગ્ય અગ્ર સચિવ જયંતિ રવિએ જણાવ્યું કે, હોટસ્પોટ વિસ્તારોમાં સઘન સર્વેલન્સ કરવામાં આવી રહ્યું છે. ચેપને હોટસ્પોટ વિસ્તારમાં જ ડામવા માટે અને એ વિસ્તારોમાં એકમાંથી બીજામાં ચેપ ન પ્રસરે એ માટે એક-એક વ્યક્તિનું ટેસ્ટિંગ કરવામાં આવી રહ્યું છે. જેના કારણે કેસોમાં વધારો થઇ રહ્યો છે.
