ઈરાન હવે એપલ અને માઈક્રોસોફ્ટ જેવી અમેરિકન કંપનીઓને નિશાન બનાવશે, કર્મચારીઓને ઓફીસ ખાલી કરવાનું અલ્ટીમેટમ

IRGC attack US linked companies

 મધ્ય પૂર્વમાં ચાલી રહેલા તણાવ વચ્ચે, ઈરાનના રિવોલ્યુશનરી ગાર્ડ્સે એક મોટી ધમકી આપી છે. IRGC એ જણાવ્યું છે કે તે યુનાઇટેડ સ્ટેટ્સ સાથે જોડાયેલી મોટી કંપનીઓને નિશાન બનાવીને કોઈપણ હત્યાનો બદલો લેશે. આ નિવેદનથી વૈશ્વિક સ્તરે સુરક્ષા એજન્સીઓ અને કોર્પોરેટ જગતમાં આઘાતની લહેર ફેલાઈ ગઈ છે.

તત્કાલ કાર્યસ્થળ ખાલી કરવાનો આદેશ 

IRGC દ્વારા જારી કરાયેલા એક નિવેદનમાં, આ કંપનીઓમાં કામ કરતા કર્મચારીઓને તાત્કાલિક તેમના કાર્યસ્થળો ખાલી કરવાની સલાહ આપવામાં આવી છે. IRGC એ આ કંપનીઓની ઓફિસોની એક કિલોમીટરની ત્રિજ્યામાં રહેતા સ્થાનિક રહેવાસીઓને પણ તેમની વ્યક્તિગત સલામતી સુનિશ્ચિત કરવા માટે સલામત સ્થળે જવાની અપીલ કરી છે.

 આ કંપનીઓને આપવામાં આવ્યું અલ્ટીમેટમ  

IRGC એ આ કંપનીઓની યાદી પણ જાહેર કરી છે. આ યાદીમાં સિસ્કો, HP, ઇન્ટેલ, ઓરેકલ, માઇક્રોસોફ્ટ, એપલ, ગૂગલ, મેટા, IBM, ડેલ, Nvidia, JPMorgan Chase, Tesla, General Electric, Boeing અને અન્ય કંપનીઓનો સમાવેશ થાય છે. નિવેદનમાં સ્પષ્ટ કરવામાં આવ્યું છે કે આ નિર્દેશ 1 એપ્રિલના રોજ તેહરાન સમય મુજબ રાત્રે 8:00 વાગ્યે અમલમાં આવશે.

યુએસ એ આપી ધમકી 

IRGC નું આ નિવેદન એવા સમયે આવ્યું છે જ્યારે યુનાઇટેડ સ્ટેટ્સ અને ઈરાન વચ્ચે ચાલી રહેલ સંઘર્ષ એક મહત્વપૂર્ણ અને ખતરનાક તબક્કે પહોંચી ગયો છે. અમેરિકાના સંરક્ષણ સચિવ પીટ હેગસેથે ઈરાનને કડક ચેતવણી આપતા કહ્યું કે તેણે કાં તો યુનાઇટેડ સ્ટેટ્સ સાથે કરાર કરવો પડશે અથવા "ગંભીર લશ્કરી કાર્યવાહી"નો સામનો કરવા માટે તૈયાર રહેવું પડશે. હેગસેથે સ્પષ્ટતા કરી કે આવનારા દિવસો આ સંઘર્ષના ભવિષ્ય માટે નિર્ણાયક સાબિત થશે, અને મુકાબલો ફક્ત રાષ્ટ્રપતિ ડોનાલ્ડ ટ્રમ્પની શરતો પર જ સમાપ્ત થશે.

ઈરાનના નવા નેતૃત્વને ચેતવણી આપતા, સચિવ હેગસેથે તેમને અગાઉના શાસન કરતાં વધુ સમજદારી દર્શાવવા વિનંતી કરી. તેમણે કહ્યું, "રાષ્ટ્રપતિ ટ્રમ્પ ન તો બકવાસ કરે છે કે ન તો પીછેહઠ કરે છે. ઈરાનના નવા શાસને એ સ્વીકારવું જોઈએ કે 'શાસન પરિવર્તન' વાસ્તવમાં પહેલાથી જ થઈ ચૂક્યું છે. ટ્રમ્પ વાટાઘાટો કરવા માટે તૈયાર છે, અને શરતો જાણીતી છે. જો ઈરાન તૈયાર નહીં હોય, તો યુએસ સંરક્ષણ વિભાગ તેના હુમલાઓ વધુ તીવ્રતા સાથે ચાલુ રાખશે.