મળતી માહિતી મુજબ જૂનાગઢ જિલ્લામાં રહેતો અમિત જોટવા નામનો ઉમેદવાર પોલીસ ભરતીની શારીરિક કસોટી માટે અમરેલી સ્થિત મેદાનમાં દોડવા માટે આવ્યો હતો. અમિતે દોડ શરૂ કર્યા બાદ થોડી જ વારમાં ગ્રાઉન્ડ ઉપર પટકાયો હતો. જ્યાં જોત જોતમાં યુવક કે દુનિયામાંથી શ્વાસ છોડી દીધો હતો. હાજર પોલીસ જવાનો દ્વારા અમિતને તાત્કાલિક હોસ્પિટલ સારવાર માટે ખસેડવામાં આવ્યો હતો જ્યાં તેમનું મોત થયું હતું. સમગ્ર ઘટનાની જાણ પરિવારને કરવામાં આવતા પરિવાર પણ હાલ આઘાતમાં સરી પડ્યો છે. સરકારી ભરતીની આ દોડ યુવાન માટે જિંદગીની છેલ્લી દોડ બની ગઈ તેમ કહી શકાય.
લોકરક્ષક દળની લેખિત પરીક્ષાને લઈને છેલ્લા કેટલાક સમયગાળાથી રાહ જોવાઈ રહી છે, ત્યારે ગઈકાલે લોકરક્ષક ભરતી બોર્ડના અધ્યક્ષ હસમુખ પટેલે ટ્વીટ કરીને મહત્વની જાણકારી આપી હતી. જો શારીરિક કસોટી સમય પત્રક મુજબ પૂર્ણ થાય તો 13, 20 અથવા 27 માર્ચના લોકરક્ષક ભરતીની લેખિત પરીક્ષા લેવાનું આયોજન છે. આ દિવસોમાં GPSC તથા ગૌણ સેવાની પરીક્ષા ના હોય તેવી તારીખ પસંદ કરવામાં આવશે. તે વખતની કોરોનાની સ્થિતિ પણ ધ્યાનમાં લેવામાં આવશે.
