ભારતીય તટરક્ષક દળે ગુજરાતના કચ્છ નજીક આવેલાં જખૌ બંદર પાસેથી 18 પાકિસ્તાનીઓની ધરપકડ કરી છે. અધિકૃત સૂત્રોના જણાવ્યા મુજબ કોસ્ટગાર્ડે કરાંચી બંદરની બે બોટને પણ જપ્ત કરી છે.
આ પહેલાં 16મી જાન્યુઆરીના રોજ પણ ભારતીય તટરક્ષક દળે ગુજરાત બંદરેથી બે પાકિસ્તાની બોટ સહિત 17 પાકિસ્તાનીઓની ધરપકડ કરી હતી. બોટનો કબ્જો લીધા બાદ ઈન્ડીયન કોસ્ટગાર્ડ (આઈસીજી-ભારતીય તટરક્ષક દળ)નું જહાજ જખૌ બંદરે આવ્યું હતું. જયાં ધરપકડ કરાયેલા તમામની પૂછપરછ કરવામાં આવશે.
અત્રે ઉલ્લેખનીય છે કે, ગતવર્ષની 26 નવેમ્બરે દેશની આર્થિક અને મનોરંજન રાજધાની મુંબઈ પર થયેલા હુમલાના ત્રાસવાદીઓ દરિયાઈ માર્ગે જ આવ્યા હોવાનું બહાર આવ્યા બાદ તટરક્ષક દળે બંદરો પર સુરક્ષા વ્યવસ્થા સઘન બનાવી દીધી છે.
