પાકિસ્તાન ક્રિકેટ ટીમના પૂર્વ કેપ્ટન શાહિદ આફ્રિદીને સોશિયલ મીડિયા પર ટ્રોલ કરવામાં આવી રહ્યા છે. આફ્રિદીએ તાજેતરમાં જ એક ઇન્ટરવ્યુમાં કહ્યું છે કે, જો તેમના જીવન પર કોઈ ફિલ્મ બને છે, તો તે ફિલ્મમાં તેમનુ પાત્રના અભિનયની ભૂમિકા હોલીવુડના સુપરસ્ટાર ટોમ ક્રુઝ ભજવે. આ નિવેદન બાદ આફ્રિદીની સોશિયલ મીડિયા પર મજાક ઉડાવવામાં આવી રહી છે. ફૈન આફ્રિદીની મજાક ઉડાવતા કહી રહ્યા છે કે ફિલ્મમાં ટોમ ક્રુઝને લેવા માટે પાકિસ્તાન બે વાર વેચાય જશે.
ઉલ્લેખનીય છે કે શાહિદ આફ્રિદીએ તાજેતરમાં ભારત, કાશ્મીર અને વડા પ્રધાન નરેન્દ્ર મોદી વિશે કેટલીક વિવાદિત ટિપ્પણી કરી હતી. આફ્રિદીના આ નિવેદનો બાદ પણ સોશિયલ મીડિયા પર તેની આકરી ટીકા થઈ હતી. સોશિયલ મીડિયા પર વાયરલ થયેલા વીડિયોમાં આફ્રિદી વડા પ્રધાન મોદીની ટીકા કરતા જોવા મળ્યા હતા.
આફ્રિદીનો આ વીડિયો વાયરલ થયા પછી ભારતીય ક્રિકેટર ગૌતમ ગંભીર, શિખર ધવન, હરભજન સિંહ અને યુવરાજ સિંહે તેમની સોશિયલ મીડિયા પર આકરી ટીકા કરી હતી. હરભજન અને યુવરાજે આફ્રિદી સાથેના બધા સંબંધો ખતમ કરવાની વાત કરી હતી અને કહ્યું હતું કે હવે તેમની વચ્ચે કોઈ મિત્રતા નથી.
