ધનની દેવી લક્ષ્મી-ગણેશજીનુ પૂજન આ વખતે દિવાળીમાં 27 ઓક્ટોબરના રોજ રાજયોગ વચ્ચે કરવામાં આવશે. આ પહેલા દિવાળીની ખરીદી અને લક્ષ્મી પૂજનની સામાગ્રી લાવવા માટે સતત બે દિવસ પુષ્ય નક્ષત્ર આવી રહ્યુ છે. દિવાળીની ખરીદી માટે આ બંને દિવસ ખૂબ શુભકારી રહેશે. ઠીક છ દિવસ પહેલા 21 ઓક્ટોબરના રોજ સોમ પુષ્ય નક્ષત્ર અને 22 ઓક્ટોબરના રોજ ભોમ મંગળ પુષ્ય નક્ષત્ર આવશે.
બંને દિવસ અન્ય શુભ યોગના સંયોગ પણ રહેશે. પંચાગ મુજબ આ બંને જ દિવસ વેપાર, ખરીદી કરવા ધનતેરસ જેટલુ જ શુભકારી રહેશે. દિવાળી પહેલા આવનારા પુષ્ય નક્ષત્રમાં તહેવારની ખરીદી શુભ માનવામાં આવે છે. આ જ કારણ છે કે લોકો પુષ્ય નક્ષત્રની રાહ જુએ છે. ખાસ કરીને મોંઘી ખરીદી આ નક્ષત્રમાં કરવી જોઈએ. આ નક્ષત્રમાં ગાડી, મકાન, દુકાન, કપડા, સોનુ, વાસણ, જમીન, મકાન વગેરેની ખરીદી કરી શકો છો. પુષ્ય નક્ષત્રમાં સોનુ ખરીદવાનુ વિશેષ મહત્વ છે. પુષ્ય નક્ષત્ર 21 ઓક્ટોબરના રોજ સાંજે 5.33 વાગ્યે શરૂ થઈને 22 ઓક્ટોબર મંગળવારે સાંજે 4.40 વાગ્યા સુધી છે. આ દરમિયાન કરવામાં આવેલ ખરીદી અક્ષય રહેશે. જેનો ક્યારેય ક્ષય થતો નથી.
