દક્ષિણ ગુજરાતના વલસાડ જિલ્લાના કપરાડા વિસ્તારમાં આજે એક કાળજું કંપાવી દે તેવી દુર્ઘટના સર્જાઈ છે. કપરાડાથી નાનાપોન્ડા તરફ જઈ રહેલી એક ઈકો કાર અને સામેથી આવતી ટ્રક વચ્ચે થયેલી જોરદાર અથડામણમાં સાત લોકોએ પોતાનો જીવ ગુમાવ્યો છે. આ અકસ્માત એટલો ભયાનક હતો કે ઈકો કારનો કચ્ચરઘાણ નીકળી ગયો હતો અને ઘટનાસ્થળે જ પાંચ લોકોના કમકમાટીભર્યા મોત નીપજ્યા હતા.
એક જ પરિવારમાં માતમ: આંબા જંગલ ગામમાં શોકનું મોજું
મળતી માહિતી મુજબ, ઈકો કારમાં સવાર તમામ મુસાફરો કપરાડાના આંબા જંગલ વિસ્તારના વતની હતા અને એક જ પરિવારના સભ્યો હતા. પરિવારના સભ્યો કોઈ કામ અર્થે કપરાડાથી નાનાપોન્ડા તરફ જઈ રહ્યા હતા, ત્યારે માર્ગમાં કાળ રૂપી ટ્રક સામે આવી હતી. આ દુર્ઘટનામાં પરિવારના કુલ સાત સભ્યોના મોત થતા આખું ગામ હિબકે ચઢ્યું છે અને પંથકમાં ગમગીની છવાઈ ગઈ છે.
અકસ્માતનું દ્રશ્ય જોઈ કાળજું ધ્રૂજી ઉઠ્યું
ટ્રક અને ઈકો વચ્ચેની ટક્કર એટલી જોરદાર હતી કે કારનો આગળનો ભાગ સંપૂર્ણપણે ચકનાચૂર થઈ ગયો હતો. અકસ્માત બાદ સ્થાનિક લોકો મદદે દોડી આવ્યા હતા અને પોલીસ તેમજ 108 એમ્બ્યુલન્સને જાણ કરી હતી. બચાવ કામગીરી દરમિયાન ઈજાગ્રસ્તોને તાત્કાલિક હોસ્પિટલ ખસેડવામાં આવ્યા હતા, પરંતુ ટૂંકી સારવાર બાદ મૃત્યુઆંક વધીને સાત પર પહોંચ્યો હતો.
પોલીસ તપાસ: ઓવરસ્પીડ કે બેદરકારી?
ઘટનાની જાણ થતા જ કપરાડા પોલીસ કાફલો સ્થળ પર પહોંચ્યો હતો અને મૃતદેહોને પોસ્ટમોર્ટમ માટે ખસેડ્યા હતા. પ્રાથમિક તપાસમાં અકસ્માતનું કારણ વાહનની ઓવરસ્પીડ અથવા ચાલકની બેદરકારી હોવાનું મનાય રહ્યું છે. પોલીસે અકસ્માતનો ગુનો નોંધી વધુ તપાસ હાથ ધરી છે. હાઈવે પર સર્જાયેલા આ અકસ્માતને પગલે ટ્રાફિક જામના દ્રશ્યો પણ સર્જાયા હતા, જેને પોલીસે દૂર કરાવ્યા હતા.
