દેશના ઘણા રાજ્યોમાં ચોમાસાએ વિદાય લીધી છે, જ્યારે કેટલાક સ્થળોએ ચોમાસું હજુ પણ સક્રિય છે. દરમિયાન, હવામાન વિભાગે દક્ષિણ ભારત અને પૂર્વોત્તર ભારતના ઘણા રાજ્યોમાં આગામી 24 કલાકમાં ભારે વરસાદની ચેતવણી જારી કરી છે. તે જ સમયે, દિલ્હી, હરિયાણા, પંજાબ, મધ્યપ્રદેશ, રાજસ્થાન સહિત અન્ય ઘણા રાજ્યોમાં હવામાન શુષ્ક રહેશે. આગામી દિવસોમાં દિલ્હીના હવામાનમાં કોઈ ખાસ ફેરફાર નહીં થાય. આકાશ મોટે ભાગે સ્વચ્છ રહેશે અને વરસાદની કોઈ શક્યતા નથી.
ભારે વરસાદની પીળી ચેતવણી
હવામાન વિભાગે તમિલનાડુ, કેરળ, અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરા, પુડુચેરી, કરાઈકલ અને તટીય કર્ણાટકમાં ભારે વરસાદ માટે યલો એલર્ટ જાહેર કર્યું છે. રાયલસીમા, તેલંગાણા, તટીય આંધ્રપ્રદેશમાં આજે છૂટાછવાયાથી મધ્યમ વરસાદની સંભાવના છે. IMDએ કહ્યું છે કે 11 ઓક્ટોબર સુધી 35-45 કિમી પ્રતિ કલાકની ઝડપે પવન ફૂંકાઈ શકે છે.
ગુજરાતમાં વરસાદ નવરાત્રિ બગાડશે
ગુજરાતમાં નવરાત્રિ પર્વની ધામધૂમથી ઠેર ઠેર ઉજવણી થઇ રહી છે. ખેલૈયાઓ મનમૂકીને માતાજીના ગરબા રમી રહ્યા છે. પરંતુ આ વખતે ફરી એકવાર આફતના વાદળો ઘેરાયાં છે. હવામાન નિષ્ણાત અંબાલાલ પટેલે નવરાત્રિમાં પાંચ દિવસ વરસાદ પડવાની આગાહી કરી છે. જો વરસાદ પડશે તો ખેલૈયાની મજા બગડશે. ત્યારે હવામાન નિષ્ણાત અંબાલાલ પટેલે આજથી 12 ઓક્ટોબરની વચ્ચે ગુજરાતમાં હળવા વરસાદની આગાહી કરી છે. ખાસ કરીને દક્ષિણ ગુજરાત અને દક્ષિણ સૌરાષ્ટ્રના કેટલાક ભાગોમાં વરસાદ વરસી શકે છે.
દિલ્હીનુ હવામાન અપડેટ
ઉત્તર-પશ્ચિમ, પશ્ચિમ, પૂર્વ અને મધ્ય ભારત માટે, હવામાન વિભાગે કોઈ વરસાદની આગાહી કરી નથી અને હવામાન સામાન્ય રહેશે. દિલ્હીમાં આકાશ આંશિક વાદળછાયું રહેશે અને દિવસનું મહત્તમ તાપમાન 35 ડિગ્રી સેલ્સિયસ સુધી પહોંચવાની શક્યતા છે. દિવસનું લઘુત્તમ તાપમાન 23 ડિગ્રી સેલ્સિયસ રહેવાની શક્યતા છે.
દક્ષિણ-પશ્ચિમમાં ચોમાસાની વિદાય
હવામાન વિભાગના જણાવ્યા અનુસાર ગુજરાત, મધ્યપ્રદેશ અને મહારાષ્ટ્રમાં ચોમાસુ ટૂંક સમયમાં વિદાય લેશે. જ્યારે દિલ્હી, હરિયાણા અને ઉત્તર પ્રદેશના ઘણા ભાગોમાંથી ચોમાસાએ વિદાય લીધી છે.
