શુક્લા, કમાન્ડર પેગી વ્હિટસન, મિશન નિષ્ણાતો પોલેન્ડના સ્લેવોજ ઉજ્નાન્સ્કી-વિસ્નીવસ્કી અને હંગેરીના ટિબોર કાપુને લઈને ડ્રેગન 'ગ્રેસ' અવકાશયાન સોમવારે ભારતીય સમય મુજબ સાંજે ૪:૪૫ વાગ્યે અવકાશ મથકથી અલગ થઈ ગયું. એક્સિઓમ-૪ મિશનનું સંચાલન કરતી કંપની સ્પેસએક્સે 'X' પર એક પોસ્ટમાં જણાવ્યું હતું કે, "ડ્રેગન અવકાશયાન અને એક્સિઓમ સ્પેસ AX-૪ ના તમામ સભ્યો મંગળવારે ભારતીય સમય મુજબ બપોરે ૩:૦૧ વાગ્યે પૃથ્વીના વાતાવરણમાં ફરી પ્રવેશ કરશે અને સાન ડિએગો કિનારાથી પાણીમાં ઉતરશે." તેમાં કહેવામાં આવ્યું છે કે અવકાશયાન પેસિફિક મહાસાગરમાં ઉતરતા પહેલા ટૂંકા ધ્વનિ વિસ્ફોટ સાથે તેના આગમનની જાહેરાત પણ કરશે.
અવકાશયાન પૃથ્વીના વાતાવરણમાં ફરી પ્રવેશતાની સાથે જ, આજે ભારતીય સમય મુજબ બપોરે 2:07 વાગ્યે પેસિફિક મહાસાગર પર 'ડી-ઓર્બિટ બર્ન' થવાની ધારણા છે. જ્યારે કોઈ અવકાશયાન પૃથ્વીની પરિક્રમા કરી રહ્યું હોય અને તેને પૃથ્વી પર પાછું લાવવાનું હોય, ત્યારે તેની ગતિ ઘટાડવી જરૂરી છે જેથી તે ભ્રમણકક્ષામાંથી બહાર નીકળીને પૃથ્વીના વાતાવરણમાં પ્રવેશ કરી શકે. આ ગતિ ઘટાડવા માટે, અવકાશયાનના થ્રસ્ટર્સ (નાના એન્જિન) ચોક્કસ સમય અને દિશામાં ફાયર કરવામાં આવે છે. આ પ્રક્રિયાને 'ડી-ઓર્બિટ બર્ન' કહેવામાં આવે છે. અંતિમ તૈયારીઓમાં કેપ્સ્યુલના થડને અલગ કરવાનો અને વાતાવરણમાં પ્રવેશતા પહેલા 'હીટ કવચ'ને અનુકૂલિત કરવાનો સમાવેશ થાય છે, જ્યાં અવકાશયાન લગભગ 1,600 ડિગ્રી સેલ્સિયસ તાપમાનના સંપર્કમાં આવશે.
