Parliament Winter Session 2023: ગૃહની અવમાનનાના કિસ્સામાં, સત્રના બાકીના સમયગાળા માટે 30 સભ્યોને સસ્પેન્ડ કરવામાં આવ્યા છે અને વિશેષાધિકાર સમિતિના અહેવાલ સુધી અન્ય ત્રણ સભ્યોને સસ્પેન્ડ કરવામાં આવ્યા છે. સસ્પેન્ડ કરાયેલા સાંસદોમાં સાંસદ અને લોકસભામાં કોંગ્રેસ સંસદીય દળના નેતા અધીર રંજન ચૌધરીનો પણ સમાવેશ થાય છે. સંસદની સુરક્ષામાં ખામી (Parliament Security Breach) ને લઈને સોમવારે લોકસભા અને રાજ્યસભામાં વિરોધ પક્ષોએ હંગામો મચાવ્યો હતો. જેના કારણે લોકસભા અધ્યક્ષે આ કાર્યવાહી કરી હતી. ગયા અઠવાડિયે 13 સાંસદોને લોકસભામાંથી સસ્પેન્ડ કરવામાં આવ્યા હતા.
ગૃહમાં બેસવાની ચેતવણી છતાં પ્લેકાર્ડ લહેરાવવાના અને ગૃહની અવમાનના મામલે કોંગ્રેસના નેતાઓ અધીર રંજન ચૌધરી, કે. સુરેશ અને ગૌરવ ગોગોઈ, તૃણમૂલ કોંગ્રેસના સભ્યો કલ્યાણ બેનર્જી, સૌગત રોય અને પ્રતિમા મંડલ, ડીએમકેના સભ્યો ટીઆર બાલુ, દયાનિધિ મારન અને એ રાજા, આરએસપીના એનકે પ્રેમચંદ્રન સહિત 30 સભ્યોને સંસદ સત્રના બાકીના સમયગાળા માટે સસ્પેન્ડ કરવામાં આવ્યા હતા.
સસ્પેંડ થયેલા સભ્યોએ કર્યો વિરોધ પ્રદર્શન
ગયા અઠવાડિયે ગૃહના તિરસ્કારના કેસમાં સસ્પેન્ડ કરાયેલા લોકસભાના 13 સભ્યોમાંથી કેટલાકએ સોમવારે સંસદ ભવનનાં પગથિયાં પર વિરોધ કર્યો હતો અને સંસદમાં સુરક્ષામાં ખામીઓના મુદ્દે ગૃહ પ્રધાન અમિત શાહના નિવેદનની માંગ કરી હતી. કોંગ્રેસના સાંસદો મોહમ્મદ જાવેદ, હિબી એડન, બેની બેહનન, ડીન કુરિયાકોસે અને સીપીઆઈ(એમ)ના સભ્ય એસ વેંકટેશને સંસદ ભવનના મકર ગેટના પગથિયાં પર બેસીને સરકારનો વિરોધ કર્યો હતો. તેમના હાથમાં પ્લેકાર્ડ પણ હતા.
