સંસદના શિયાળુ સત્ર પહેલા 28 નવેમ્બરે સર્વપક્ષીય બેઠક યોજાય તેવી શક્યતા છે. આ બેઠકમાં વડાપ્રધાન નરેન્દ્ર મોદી પણ ભાગ લઈ શકે છે. આગામી સોમવાર એટલે કે 29 નવેમ્બરથી સંસદનું શિયાળુ સત્ર શરૂ થવા જઈ રહ્યું છે. છેલ્લા દોઢ વર્ષમાં યોજાયેલા સંસદ સત્રની જેમ શિયાળુ સત્ર પણ કોવિડ-19 પ્રોટોકોલને અનુસરીને યોજાશે. સમગ્ર સત્ર દરમિયાન લગભગ 20 બેઠકો થશે.
લોકસભા સચિવાલયે તાજેતરમાં એક નિવેદનમાં કહ્યું હતું કે, “17મી લોકસભાનું સાતમું સત્ર 29 નવેમ્બર, 2021ના રોજ શરૂ થશે. સત્તાવાર વ્યવસાયની આવશ્યકતાઓને આધિન, સત્ર 23 ડિસેમ્બર, 2021 ના રોજ સમાપ્ત થવાની સંભાવના છે. તે જ સમયે, રાજ્યસભાએ પણ આવો જ આદેશ જારી કર્યો હતો.
