ગુજરાતમાં ગીરની કેસર કેરીની સીઝન શરૂ થઇ ગઇ છે. છેલ્લા ચાર દિવસથી જૂનાગઢ માર્કેટિંગ યાર્ડમાં કેસર કેરી આવી રહી છે. પ્રથમ દિવસે ૨૦ બોક્સ કેરીની આવક થઇ હતી. આજે જૂનાગઢ યાર્ડમાં ગિરનારની ગોદમાં આવેલા ડેરવાણ ગામની મઠી અને મધુર કેસર કેરીનું આગમન થતા વેપારી વર્ગમાં હરખની લાગણી પ્રસરી હતી. આજે યાર્ડમાં કેસર કેરીના ૭૬ બોક્સની આવક થઇ હતી. ૧૦ કિલોના બોક્સનો ભાવ ૬૦૦થી ૨૦૦૦ રૂપિયા સુધી બોલાયા હતા. ધીમે ધીમે કેસર કેરીની આવકમાં વધારો થશે, તે સાથે ભાવમાં તબક્કાવાર ઘટાડો નોંધાશે, એમ વેપારી સૂત્રોએ જણાવ્યું હતું. આગામી સપ્તાહ સુધીમાં વંથલી અને તલાલા પંથકની કેસરની આવક પણ શરૂ થઇ જવાની શક્યતા છે.