Operation Sindhu - ઈરાન અને ઈઝરાયલ વચ્ચે વધતા તણાવથી આખી દુનિયા ચિંતિત છે. બંને દેશો સતત મિસાઈલ અને ડ્રોનથી એકબીજા પર હુમલો કરી રહ્યા છે. આ તણાવ વચ્ચે, ભારત સરકારે ઈરાનમાં ફસાયેલા ભારતીય નાગરિકોને સુરક્ષિત રીતે બહાર કાઢવા માટે 'ઓપરેશન સિંધુ' શરૂ કર્યું છે. આ ઓપરેશન દ્વારા, ભારત સરકાર ઈરાનમાં ફસાયેલા ભારતીય વિદ્યાર્થીઓને સુરક્ષિત રીતે પાછા લાવવાનું કામ કરી રહી છે. ઓપરેશનના પહેલા તબક્કામાં, 110 ભારતીય વિદ્યાર્થીઓને ઈરાનથી ભારત લાવવામાં આવ્યા છે. વિદેશ મંત્રાલયે પોતે આ માહિતી આપી છે.
વિદેશ મંત્રાલયે જણાવ્યું હતું કે 'ઓપરેશન સિંધુ'ના પહેલા તબક્કામાં, ૧૧૦ ભારતીય વિદ્યાર્થીઓને ઈરાનથી સુરક્ષિત રીતે બહાર કાઢીને ભારત લાવવામાં આવ્યા હતા. વિદેશ મંત્રાલયના જણાવ્યા અનુસાર, આ ૧૧૦ ભારતીય વિદ્યાર્થીઓને ૧૭ જૂને ઈરાનના ઉત્તરીય ભાગથી બહાર કાઢવામાં આવ્યા હતા. ત્યારબાદ, આ વિદ્યાર્થીઓને રોડ માર્ગે આર્મેનિયાની રાજધાની યેરેવન લઈ જવામાં આવ્યા હતા. ૧૮ જૂને બપોરે ૨:૫૫ વાગ્યે યેરેવનથી એક ખાસ ફ્લાઇટ દ્વારા તમામ ૧૧૦ વિદ્યાર્થીઓને નવી દિલ્હી લાવવામાં આવ્યા હતા. આ ખાસ ફ્લાઇટ ૧૯ જૂને સવારે ૧૧૦ વિદ્યાર્થીઓ સાથે દિલ્હી પહોંચી હતી.
