પાકિસ્તાનમાં પિકનિકથી પરત ફરી રહેલા લોકો પર અંધાધૂંધ ગોળીબાર, 7 લોકોના મોત; એક વ્યક્તિ ઘાયલ

પાકિસ્તાનના ખૈબર પખ્તુનખ્વા પ્રાંતમાં હિંસક ઘટનાઓ અટકવાનું નામ નથી લઈ રહી. અહીં ફરી એકવાર એક હૃદયદ્રાવક ઘટના બની છે. ખૈબર પખ્તુનખ્વા પ્રાંતમાં પિકનિકથી પાછા ફરતા મિત્રોના જૂથ પર અજાણ્યા બંદૂકધારીઓએ હુમલો કર્યો. આ હુમલામાં ઓછામાં ઓછા સાત લોકો માર્યા ગયા અને એક વ્યક્તિ ઘાયલ થયો.

હુમલાખોરોએ ગોળીબાર કર્યો

પોલીસે રવિવારે આ ઘટના અંગે માહિતી આપી. આ હુમલો પેશાવરથી લગભગ 65 કિમી દક્ષિણ-પશ્ચિમમાં કોહાટ જિલ્લાના ઉપનગરીય વિસ્તાર રેગી શિનો ખેલમાં થયો હતો. પોલીસે જણાવ્યું હતું કે લોકો ટાંડા ડેમથી તેમના વતન ગામ ખારા ઘરી મુહમ્મદ ઝાઈ પરત ફરી રહ્યા હતા, ત્યારે હુમલાખોરોએ ગોળીબાર શરૂ કર્યો હતો. પોલીસની મદદથી, બચાવ ટીમના અધિકારીઓએ મૃતદેહો અને ઘાયલોને કોહાટ જિલ્લા મુખ્યાલય હોસ્પિટલમાં લઈ ગયા. ઘાયલ વ્યક્તિને બાદમાં વિશેષ સારવાર માટે પેશાવરની હોસ્પિટલમાં રિફર કરવામાં આવ્યો.

પોલીસે શું કહ્યું?

આ હૃદયદ્રાવક ઘટના બાદ, પોલીસે કહ્યું કે બધા મૃતકો મિત્રો હતા. અધિકારીઓએ કહ્યું કે હુમલાખોરો ઘટનાસ્થળેથી ભાગી ગયા છે.