પુણેથી એક હૃદયદ્રાવક ઘટના સામે આવી છે, જ્યાં એક માતાએ બીજા લગ્નની ઘેલછામાં પોતાના જ 11 મહિનાના માસૂમ પુત્રની નિર્મમ હત્યા કરી દીધી. મહિલાએ પોતાના બાળકના માથાને સિમેન્ટના ઓટલા પર વારંવાર પછાડ્યું, જેના કારણે માસૂમનું ઘટનાસ્થળે જ મોત નીપજ્યું હતું.
ત્યારબાદ બાળકના મૃતદેહને એક બેગમાં ભરીને કૂવામાં ફેંકી દીધો હતો. પોલીસે જણાવ્યું કે આરોપી મહિલા છેલ્લા કેટલાક દિવસોથી પરેશાન હતી, તેને લાગતું હતું કે બાળકની હાજરી તેના બીજા લગ્નમાં અડચણ બની શકે છે. આ જ કારણે મહિલાએ માસૂમ બાળકની હત્યા કરી નાખી.
બાળકના રડવાથી થઈ ગઈ હતી પરેશાન
આરોપી માતાનું નામ પૂજા રવિન્દ્ર પવાર છે. પોલીસે તેની ધરપકડ કરી છે. જળગાવ MIDC પોલીસ સ્ટેશનમાં નોંધાયેલી ફરિયાદ મુજબ, પૂજા પવાર તેના પુત્ર યશ અને પરિવાર સાથે કોંકણના મુરુડ ગઈ હતી. સફર પરથી પાછા ફર્યા પછી, બાળક સતત રડતું હતું, જેના કારણે પૂજા માનસિક રીતે પરેશાન થઈ ગઈ હતી. પોલીસ તપાસમાં જાણવા મળ્યું છે કે આ સમય દરમિયાન, તેને ચિંતા થઈ ગઈ હતી કે બાળક સાથે રહેવાથી તેના બીજા લગ્નમાં અવરોધ આવશે.
સીમેંટના ઓટલા પર બાળકનુ માથુ પટક્યુ
આ વિચારથી આરોપી માતાએ પોતાના જ પુત્રને મારી નાખવાનું કાવતરું ઘડ્યું. પોલીસના જણાવ્યા અનુસાર, પૂજાએ 11 મહિનાના બાળકનું માથું ઘરની સામે સિમેન્ટના પ્લેટફોર્મ પર જોરથી અથડાવ્યું, જેનાથી તેનું તત્કાલ મોત થયુ. ઘટના પછી, તેણીએ પાણીથી જમીન પરના લોહીના ડાઘ લૂછીને પુરાવા ભૂંસી નાખવાનો પ્રયાસ કર્યો.
બોડી બેગમાં ભરી અને ખેતરના કુવામાં ફેંકી
ત્યારબાદ મહિલાએ બાળકના મૃતદેહને કપડાની થેલીમાં મૂક્યો. તેણે પાણીમાં ડુબાડવા માટે બેગમાં ભારે પથ્થરો ભરી દીધા અને નજીકના ખેતરમાં આવેલા કૂવામાં ફેંકી દીધી. ગુનો કર્યા પછી, તેણે કોઈને જાણ કરી નહીં. જ્યારે બાળકના પિતા, રવિન્દ્ર અશોક પવારને શંકા ગઈ, ત્યારે તેણે પોલીસ ફરિયાદ નોંધાવી. તપાસ દરમિયાન, આરોપી માતાની કડક પૂછપરછ કરવામાં આવી, અને તેણીએ ગુનો કબૂલ્યો. પોલીસે આરોપીની ધરપકડ કરી અને સંબંધિત કલમો હેઠળ કેસ દાખલ કર્યો. આ ઘટનાએ સમગ્ર વિસ્તારમાં શોક ફેલાવ્યો છે.
