ઑસ્ટ્રેલિયામાં 16 વર્ષથી ઓછી ઉંમરનાં બાળકોના સોશિયલ મીડિયાના ઉપયોગ પર પ્રતિબંધ મૂકતાં બિલને મંજૂરી

ઑસ્ટ્રેલિયાની સંસદે 16 વર્ષથી ઓછી ઉંમરનાં બાળકો માટે સોશિયલ મીડિયાના ઉપયોગ પર પ્રતિબંધ મૂકવાના બિલને મંજૂરી આપી દીધી છે.

આ બિલ પાસ થયા પછી ભવિષ્યમાં ઑસ્ટ્રેલિયામાં બાળકોના સોશિયલ મીડિયાના ઉપયોગ પર પ્રતિબંધ લાગશે. આ પ્રતિબંધ ઓછામાં ઓછા 12 મહિના પછી લાગૂ કરવામાં આવશે.

જો ટૅક કંપનીઓ આ કાયદાનું પાલન નહીં કરે તો તેમને પાંચ કરોડ ઑસ્ટ્રેલિયન ડૉલરનો દંડ ફટકારવામાં આવશે.

વડા પ્રધાન ઍન્થોની અલ્બેનિસે કહ્યું છે કે યુવાનોને સોશિયલ મીડિયાના 'સંકટ'થી બચાવવા માટે આ કાયદો જરૂરી છે. ઘણા વાલીઓ પણ આ માટે સહમત થયા છે. જો કે, આ કાયદાના ટીકાકારો પ્રશ્ન કરે છે કે આ પ્રતિબંધ કેવી રીતે કાર્ય કરશે અને તેની ગોપનીયતા અને સામાજિક સંબંધો પર શું અસર પડશે?

આ પહેલાં પણ દુનિયાના ઘણા દેશોએ બાળકો દ્વારા સોશિયલ મીડિયાના ઉપયોગ પર પ્રતિબંધ લગાવવાનો પ્રયાસ કર્યો છે.